Hopp til hovudinnhald

Kvalifiseringsliste for utvida stipend til dekning av skulepengar ved utvalde lærestader i land utanfor Norden

Norske studentar kan ha rett på utvida stipend frå Lånekassen når dei studerer ved enkelte utanlandske universitet og høgskular av særs høg kvalitet. Her finn du oppdatert liste over desse institusjonane.

Sist oppdatert : 22. oktober 2026

Utvida stipend til å dekke skulepengar ved utvalde lærestader

Kunnskapsdepartementet har gitt HK-dir ansvar for å oppdatere kvalifiseringslista for utvida stipend kvart år.

Norske statsborgarar kan som hovudregel få lån og stipend frå Lånekassen til å dekke skulepengar ved studiar utanfor Norden etter ordinære satsar frå Lånekassen. Studentar ved utvalde lærestader av særleg høg kvalitet kan få utvida stipend til skulepengar eller ekstralån. Det er Lånekassen som behandlar søknader og betaler ut støtta. Du finn oppdaterte vilkår og satsar på nettsidene til Lånekassen.

Kvalifiseringslista byggjer på to internasjonale rangeringar av forskingsuniversitet: Times Higher Education si rangering av verdsuniversitet og Academic Ranking of World Universities (ARWU), òg kalla Shanghai-rangeringa. HK-dir vurderer dei 100 høgast rangerte lærestadene i kvar rangering. For å bli vurdert, må ein lærestad vere med i begge rangeringane. Plasseringane i dei to rangeringane blir lagde saman, og dei 75 lærestadene utanfor Norden med lågast samla poengsum kjem med på kvalifiseringslista.

Berre studentar ved lærestader på kvalifiseringslista kan få utvida stipend for skulepengar. Lista viser kva lærestader som oppfyller kvalitetskrava, men ikkje om lærestadene krev skulepengar, eller kor høge skulepengane er. Høge skulepengar er ikkje i seg sjølv eit teikn på høg kvalitet eller eit vurderingskrav i vurderingsmomenta for lista. Mange av lærestadene på lista krev altså ikkje skulepengar.

Kva skjer når kvalifiseringslista vert endra frå år til år?

Kvalifiseringslista vert revidert kvart år. Dersom du er i gong med ein grad ved ein lærestad som då du byrja sto på kvalifiseringslista, vil du behalde utvida stipend for heile graden sjølv om lærestaden fell ut av lista ved ei seinare revidering. Dersom du går på ein lærestad som ved listerevidering etter at du har byrja kjem inn under ordninga, har du rett på utvida stipend frå og med det skuleåret der lærestaden kom med og til du har fullført grada di. Dersom lærestaden din kjem inn på lista medan du er under utdanning kan du ikkje krevje utvida stipend bakover i tid. For enkeltvise utvekslingssemester som del av ein grad er det kvalifiseringslista for det skuleåret utvekslinga skjer som gjeld, sjølv om utvekslinga har vore planlagt i fleire år. Merk at for enkeltvise utvekslingssemester kan norske lærestader ha samarbeidsavtalar som reduserer skulepengesatsen for deira studentar.

Lista for studieåret 2027/28

Lista er ordna alfabetisk på land. Lærestadene er igjen oppført alfabetisk under kvart land. Talet på godkjende lærestader per land står i parentes. Merk at der namnet på lærestaden peikar mot ein særskild campus eller avdeling av lærestaden, så er det berre denne campusen/avdelinga som kvalifiserer til utvida stipend. Til dømes har University of California ti ulike campusar, men berre fem av dei kvalifiserer til utvida stipend.

Studentar som allereie er i gong med eit studium ved eit av universiteta som fell ut av lista, vil framleis ha rett til å fullføra graden med lån og stipend.

Kontakt oss

Ida Iselin Eriksson

Seniorrådgiver

E-post:ida.eriksson@hkdir.no