Slik går du fram for å finne partnar

– Først og fremst: Ver aktiv og delta på ulike arenaer!

Det seier Merete Mikkelsen og Tove Haganes. Dei har begge mykje erfaring med Erasmus+-programmet – og med å finne gode partnarar til prosjekt dei jobbar med. Merete som direktør for Vest-Norges Brusselkontor og Tove som hovudprosjektleiar for samfunnsutvikling i Alver kommune.

– Deltaking på workshops, seminar og internasjonale konferansar er gode arenaer for å bygge nettverk og søke prosjektpartnarar, utdjupar dei.

Sjå konkrete tips for korleis ein finn fram til relevante arrangement lengre ned i saka. Men først, få med deg desse tipsa:

Leit etter partnarar som har likt utfordringsbilete

Det er viktig å leite etter partnarar som har like utfordringar og ønskje om å endra desse gjennom felles prosjektmål. Viss utfordringar og problemstillingar er forskjellige, kan det vere vanskelegare å finne nytteverdi for alle involverte. Det vil difor vere bra å ha gode møte i forkant av søknadsskrivinga, slik at ein får avklart dette tidleg.

Når ein skriv ein prosjektsøknad, er det naturleg å hente underbyggande kunnskapsgrunnlag frå forskingsrapportar og aktuelle problemstillingar. Ut i frå dette vil det gjerne peike seg ut nokre land og partnarar som vil vere meir relevante å samarbeide med enn andre.

Bruk eksisterande nettverk

Om ein har jobba saman i tidlegare prosjekt og det har gått fint, vil det vere ein styrke for kommande prosjekt. Det er viktig å kunne jobbe godt saman og trivast gjennom heile prosjektperioden.

– Då eg skulle søke etter partnarar til Erasmus+-prosjektet vårt, sende eg ein e-post til tidlegare samarbeidspartnarar i eit Interreg-prosjekt. Eg la fram prosjektideen og spurde om nokon var interessert i å vere med. Det var fleire som melde si interesse, og me hadde nokon møte der me stod att med dei som hadde like utfordringar – i tillegg til mest likt geografisk og demografisk utgangspunkt. Desse hadde også mest motivasjon og ressursar til å samarbeide gjennom ein prosjektperiode på tre år, seier Tove Haganes.

Bruk andre nettverk

Merete Mikkelsen har liknande tankar kring dette:

– Har du eller arbeidsplassen din gode kontaktar innan eit felt, men har tidlegare samarbeida? Då kan det vere lurt å få med ein eller fleire av desse inn i ein ny type samarbeid som til dømes eit Erasmus+-prosjekt. Det er viktig å stole på at prosjektpartnaren leverer i dei ulike fasane av prosjektet – frå søknad til gjennomføring. Difor er det enklare å samarbeida med nokon ein kjennar frå før.

Viss du ikkje har kontaktar frå før, kan du sjekke med andre norske aktørar som har organisert EU-prosjekt. Kanskje dei har nokre gode tips – har dei hatt prosjekt som liknar på det du ynskjer å få til? Kanskje veit dei til og med om potensielle partnarar som er på jakt etter nye samarbeid?

Lykke til!

Her finn du relevante arrangement

• Fylkeskommunane har ofte gode nettverk gjennom tidlegare og eksisterande prosjekt som søkjarar kan dra nytte av.
• Dei fleste fylka har eigne kontor i Brussel og tilgang på nettverk som kan nyttast. Dei hjelper ofte til med å finne samarbeidspartnarar, og har ofte mykje god informasjon på nettsidene sine.
• Det vert jamleg organisert internasjonale Training and Cooperation Activities (TCA). Sjekk denne nettsida: https://salto-et.net/
• Du kan også søkje i prosjektdatabasen til Europakommisjonen. Her kan du filtrere på mellom anna land og tema: https://erasmus-plus.ec.europa.eu/projects