Prosjektet School 21 - Let's go out! skal få slovenske skuleelevar ut av klasseromma

Bakgrunn

Korleis gjere undervisninga meir relevant og spennande? Eitt svar er å dra ut av klasserommet og ta nærmiljøet i bruk. Møre og Romsdal fylkeskommune og Friluftsrådet Nordmøre og Romsdal har vore med i eit EØS-prosjekt som skal få elevar i Slovenia ut av klasseromma.

– Me hadde nok litt ulike idear om kva uteskule skal vere, fortel Marte Melbø i Friluftsrådet.

– I Noreg går me ut og nyttar naturen i nærmiljøet. I Slovenia ville dei byggje fysiske uteskular, noko som var eit heilt ukjent konsept for oss. Slovenarane var også opptekne av å introdusere uteaktivitetar i vidaregåande skule, medan me har mest erfaring med barnehage og barneskule.

Det har vore veldig interessant å følgje prosjektet, kanskje slike uteskular også kunne vere eit nyttig supplement i Noreg, resonnerer ho.

Aktivitetar

I prosjektet var det fleire besøk i båe retningar mellom Slovenia og Noreg.

– Det har vore super dialog undervegs, fortel Olav Fransson Drangeid i fylkeskommunen. Prosjektet har omfatta både barne-, ungdoms- og vidaregåande skular, og det er utvikla både faglege ressursar og fysiske uteklasserom i Slovenia.

Resultat

Som resultat av prosjektet er det bygd to uteklasserom i Slovenia, eitt på ein barneskule og eitt på ein vidaregåande skule. Her har elevane tilgang på blant anna hagekassar og utstyr for å utforske nærområdet. Det er også laga ei handbok i å drive uteskule, og slovenske lærarar har etablert eit nettverk for å utveksle erfaringar. Det slovenske utdanningsdepartementet har vist interesse, og det har vore mykje offentleg merksemd om prosjektet.

Råd og tips

– Å finne gode partnarar er nøkkelen, seier Drangeid frå Møre og Romsdal Fylkeskommune. Det er også avgjerande at andre aktørar i regionen får direkte nytte av prosjektet, og at det ikkje er for perifert frå det ein elles driv med. Elles blir det vanskeleg å prioritere slikt arbeid.

Melbø frå Friluftsrådet peikar på at ein ikkje alltid har dei same forventningane til kva eit prosjekt skal innehalde og at dette kan vere kulturavhengig.

– Det blei laga ein del «merch» for prosjektet, drikkeflasker med prosjektlogo og liknande. Me hadde nok heller brukt desse pengane direkte på elev-aktivitetar.

Båe er likevel samde om at den slovenske koordinatoren har handtert prosjektet svært bra.

 – Det var ein del frustrerande krav til rapportering av arbeidstid, men ut over det har det administrative gått greitt, fortel Olav.

– Dette har vore spennande og lærerikt, og ein blir meir medviten på eigen praksis, konkluderer Marte, som til dagleg jobbar med å implementere læring i friluft på skulane i Nordmøre og Romsdal.

– Innsatsen har absolutt vore verd det!