Invitasjon til forlaga: Innspelsmøte om lærebokordninga for høgare utdanning
I 2026 vil det komme nokre forvaltingsmessige endringar i lærebokordninga for høgare utdanning, og vi opnar opp for innspel frå forlaga som gir ut fagbøker på norsk og samisk for universitet og høgskular.
Om arrangementet
Vi inviterer forlaga til samtalar om lærebokordninga for høgare utdanning, som HK-dir forvaltar på vegner av Kunnskapsdepartementet, for å gi innspel på korleis ordninga fungerer. Vi legg opp til å ha samtalar med kvart forlag for seg.
- Samtalane blir gjennomførte digitalt og varer opptil 30 minutt per forlag.
- For påmelding sender forlaga ein e-post til laerebokordningen@hkdir.no. De kan melde inn ønskeleg tidspunkt kvar heile og kvar halve time 29. og 30. januar, men HK-dir tar atterhald om retten til å fastsette møtetidspunkt ein av dei oppsette datoane dersom det er nødvendig. Dersom forlaget ikkje har høve til å delta dei oppsette datoane, er fredag 6. februar eit alternativ.
- Alle som har meldt si interesse, vil på førehand få informasjon om kva tema vi ønsker innspel på. Forlaga får òg høve til å ta opp tema dei sjølve er opptatt av.
I tråd med Regjeringa sin handlingsplan for norsk fagspråk i akademia – Frå ord til handling – har HK-dir fått i oppdrag å følge opp tiltak 13:
Vidareutvikle lærebokordninga i Direktoratet for høgare utdanning og kompetanse (HK-dir) for å stimulere til meir skriving og bruk av læremiddel på norsk, og vurdere styrking av ordninga når det er behov for det