Program for Ukraina-kompetanse – Eittårige midlar 2025

Alle verksemder som er registrerte i Einingsregisteret kan søkje om tilskot under denne utlysinga.

Søkjarane kan knytte til seg andre relevante samarbeidsaktørar der det er aktuelt.

Utlysinga skal finansiere prosjekt som støttar opplysnings- og informasjonstiltak om Ukraina, og som gjer norske aktørar betre skikka til å inngå samarbeid med ukrainske aktørar, med sikte på å skape følgjande effektar:

1: Auka kunnskap om Ukraina i det norske samfunnet.

Prosjekta skal:

• Styrkje interesse for og kunnskap om ukrainske samfunnstilhøve i Noreg
• Bidra til eit meir informert offentleg ordskifte om Ukraina i Noreg

2: Norske aktørar er betre rusta til samarbeid med ukrainske aktørar.

Prosjekta skal:

• Styrkje norske aktørars kunnskap knytt til samhandling med ukrainske aktørar
• Legge til rette for kontakt og samhandling mellom norske og ukrainske miljø

De kan søkje om mellom NOK 30 000 og NOK 200 000 i tilskot per prosjekt.

Utlysinga er på inntil 4 millionar norske kroner.

Prosjekta kan vare inntil 12 månader. Dei kan tidlegast starte 1. januar 2026 og må vere planlagde avslutta innan 31. desember 2026.

Kva kan midlane nyttast til?

Tilskotet frå HK-dir kan brukast til å dekkje følgjande typar kostnader:

• Produksjonskostnader (informasjonsmateriell, bøker, filmar, podkastar, digitale ressursar og liknande)
• Arrangementskostnader (kurs, føredrag, seminar, utstillingar, debattar og andre formidlingstiltak)
• Reise- og opphaldskostnader
• Innkjøpskostnader for utstyr opp til 10% av omsøkt beløp
• Andre prosjektrelaterte kostnader som er nødvendige for å oppnå relevante resultat

Lønnsmidlar blir ikkje støtta under denne utlysinga.

Budsjett kan bli redusert etter skjønn dersom kostnader framstår unødvendige eller urimelege.

HK-dirs vilkår for prosjekttilskot gjeld for gjennomføringa av prosjekta som får tilskot.

Nedanfor finn du informasjon om kva minimumskrav som gjeld for denne utlysinga og kva kriterium søknadene vil bli vurderte ut frå.

Du må levere søknaden gjennom HK-dirs søknadsportal Espresso.

I søknadsskjemaet og malen for prosjektomtale er det hjelpetekstar som rettleiar om kva slags informasjon HK-dir etterspør i dei ulike felta.

Søknaden må oppfylle følgjande minimumskrav:

• Søknaden må vere levert innan søknadsfristen som gjeld for utlysinga.
• Søknaden må vere levert gjennom HK-dirs søknadsportal (Espresso).
• Søknaden må være skriven på norsk (bokmål eller nynorsk).
• Søknaden må vere levert på vegner av ein organisasjon som kan stå som søkjar under denne utlysinga.
• Søknaden må oppfylle krava om varigheit som gjeld for utlysinga.

Søknader som ikkje oppfyller desse krava kan bli avviste eller vurderte som mangelfulle. For søknader med feil vil HK-dir gje ein kort tilleggsfrist for å rette feilen der det er mogleg. Innhald i vedlegg/lenkjer som det ikkje er stilt krav om, vil ikkje bli tekne med i vurderinga av søknaden.

Treng du rettleiing undervegs? Vi kan svare på spørsmål om utlysinga, men kan ikkje lese gjennom eller kommentere på konkrete søknadsutkast. Vi kan rettleie på e-post, telefon, i videomøte eller andlet-til-andlet. Ta gjerne kontakt med den ansvarlege for utlysinga i HK-dir.

HK-dir vil vurdere søknadane og kontrollere om dei oppfyller dei formelle krava. Så gjer direktoratet ei fagleg vurdering og gjev ein karakter på ein skala frå 1 (ikkje støtteverdig) til 3 (klart støtteverdig). Søknader som får karakter 2 eller høgare, vil inngå i ei rangert innstilling.

HK-dir fattar endeleg vedtak om tilskot basert på den endelege rangeringa av søknadene.

Søknader som oppfyller krava som gjeld for utlysinga, vil bli vurderte ut frå følgjande kriterium:

• I kva grad dei planlagde resultata er konkrete og eigna til å oppnå måla for utlysinga.
• I kva grad prosjektet har ein konkret, heilskapleg og realistisk gjennomføringsplan.
• Resultata si forventa rekkevidde og verdi for ulike grupper/aktørar i samfunnet.

Alle søkjarar vil bli informerte om utfallet av søknadsprosessen. HK-dir reknar med å kunne sende ut vedtak om tilskot i første halvdel av desember. Ei grunngjeving for karaktersettinga vil følgje som vedlegg til vedtaka.

Meir om Program for Ukraina-kompetanse

Program for Ukraina-kompetanse skal gjennom brei kompetansebygging i norsk næringsliv, fagmiljø, forvaltning og frivillig sektor gjere norske aktørar betre i stand til å bidra til ukrainsk motstandskraft og gjenreising. Det skal også bidra til at ukrainske erfaringar blir nyttiggjorde i det norsk samfunnet.

Programmet er finansiert av Utanriksdepartementet gjennom det norske Nansen-programmet og skal bidra å nå dei overordna måla for dette programmet. Meir informasjon om den sivile delen av Nansen-programmet.