Kva er realkompetansevurdering
Realkompetanse er all kompetansen ein person har. Det omfattar kompetanse personen har tileigna seg gjennom formell læring, som skulegang og studiar, ikkje-formell læring, som ulike typar kurs, og uformell læring, til dømes gjennom løna eller uløna arbeid, omsorgsarbeid heime eller aktivitetar i fritida.
Sist oppdatert : 10. september 2026Realkompetansevurdering er prosessen med å vurdere og verdsetje denne kompetansen. Realkompetansevurdering kan skje på ulike nivå i utdanningssystemet, og ulike lovverk regulerer bruken av realkompetansevurdering på dei ulike nivåa.
Realkompetansevurderinga går føre seg i fire fasar:
- Rettleiing og avklaring
- Kartlegging
- Vurdering og verdsetjing
- Dokumentasjon
Kvifor realkompetansevurdering?
Realkompetansevurdering kan:
- gje grunnlag for opptak til utdanning
- gje grunnlag for vidare opplæring mot kvalifisering. Du treng ikkje lære noko du allereie kan.
- gje dokumentasjon som kan nyttast i arbeidslivet, til dømes som prov på delkompetanse
Realkompetansevurdering i praksis
Er du nysgjerrig på korleis dette kan gå føre seg i praksis? På utdanning.no får du innblikk i korleis prosessen med realkompetansevurdering kan sjå ut for tre ulike personar.
Kven har ansvar for realkompetansevurdering?
Kommunane har ansvar for realkompetansevurdering opp mot læreplanar i førebuande opplæring for vaksne, FOV.
Fylkeskommunane har ansvar for realkompetansevurdering opp mot læreplanar i vidaregåande opplæring for vaksne, VOV.
I høgare yrkesfagleg utdanning, fagskular, og i universitets- og høgskulesektoren har den enkelte studiestaden ansvar for gjennomføring av realkompetansevurdering.
Direktoratet for høgare utdanning og kompetanse, HK-dir, har ansvar for å utvikle og gjennomføre pedagogiske rettleiingstiltak, kompetanseutvikling, støtteressursar og nettverksarbeid knytt til realkompetansevurdering. HK-dir har òg det faglege ansvaret for læreplanane i FOV.
Utdanningsdirektoratet, Udir, har ansvar for regelverk og regelverksrettleiing knytt til opplæringslova og forskriftene, og har det faglege ansvaret for læreplanane i VOV.