Senter for framifrå utdanning (SFU)

Sentre for framifrå utdanning (SFU) er ein fokusert og langsiktig innsats for å stimulere til utvikling av utdanning og innovative tilnærmingar til læring i høgare utdanning.

Siste tildeling vart gjort i 2022, og det er er ikkje planlagt nye utlysingar.

Sentra for framifrå utdanning skal vere flaggskip som skal bidra til å gje utdanningsverksemd ved universitet og høgskular eit løft nasjonalt. Kunnskapen og ressursane dei har utvikla skal koma andre utdanningsinstitusjonar til gode.

Ordninga med Sentre for framifrå utdanning blei etablert for å:

• bidra til utvikling av framifrå kvalitet i norsk høgare utdanning
• synliggjere at undervisning og forsking er likestilte oppgåver for universitet, vitskaplege høgskular og høgskular

Ordninga blei oppretta i 2010 og vart finansiert av Kunnskapsdepartementet. Ordninga blei avslutta i 2022.

Det overordna målet for Sentre for framifrå utdanning er å utvikle framifrå kvalitet i høgare utdanning. Ordninga gjev dei fremste utdanningsmiljøa i Noreg ressursar til å vidareutvikle studia sine. Ordninga inneber målretta og langsiktig innsats for å stimulere til utvikling av undervisning og innovative tilnærmingar til læring i høgare utdanning, både på bachelor- og mastergradnivå.

Ein sentral del av ordninga er å framheve framifrå forskingsbasert utdanning, undervisning og vurdering. Framifrå utvikling inneber styrka kunnskap om ulike sider av utdanning lokalt, og i høgare utdanning generelt. Ordninga er laga for å utvikle og premiere arbeidet som skjer i samhandling mellom studentar, undervisarar, støttefunksjonar, arbeidsliv og samfunnet elles. Ordninga skal òg stimulere til nye formar for studentinvolvering og -partnarskap.

Ordninga Senter for framifrå utdanning skal:

• stimulere universitet og høgskular til å etablere og utvikle fagmiljø som tilbyr framifrå utdanning
• bidra til kunnskapsbasert analyse og utvikling av undervisning og læring, som understøttar kvalitetsheving og innovasjon, og som vidare kan føre til vesentleg endring i høgare utdanning
• bidra til å utvikle og spreie kunnskap om framifrå utdanningspraksis i sektoren
• bidra til sterkare samspel mellom utdanning og relevante samfunns- og yrkesfelt

Eit senter for framifrå utdanning må difor:

• tilby framifrå FoU-basert utdanning
• utvikle innovative måtar å arbeide med FoU-basert utdanning
• inspirere til studentinvolvering og studentar sin eigarskap til læring
• utvikle og spreie kunnskap og praksis knytt til utforming av undervisning og læringsmiljø som fremjar læring
• relatere eige arbeid til internasjonal utvikling, både i høgare utdanning og innanfor eige fagfelt