Overtar oppgåver frå NOKUT

Oppdraga styrker den koordinerande rolla til direktoratet innanfor statistikk, analyse og kunnskapsgrunnlag i både høgare utdanning og høgare yrkesfagleg utdanning.

Kunnskapsdepartementet skriv i ei pressemelding at arbeidet med studiekvalitet skal styrkast og samlast i Direktoratet for høgare utdanning og kompetanse (HK-dir).

Samlar oppgåver som høyrer saman

Direktoratet får eit overordna koordineringsansvar for statistikk, analyse og informasjonsarbeid om studiekvalitet i norsk høgare utdanning og høgare yrkesfagleg utdanning frå 2025. Nasjonalt organ for kvalitet i utdanninga (NOKUT) skal bli meir reindyrka som eit fagleg uavhengig organ med akkrediterings-, tilsyns- og evalueringsoppgåver.

– Denne endringa er eitt av fleire strukturelle grep vi tek for å auke studiekvaliteten. No samlar vi oppgåver som naturleg høyrer saman, og vi frigjer viktige ressursar i NOKUT, seier forskings- og høgare utdanningsminister Oddmund Hoel.

Les heile pressemeldinga frå Kunnskapsdepartementet

Styrker arbeidet med kvalitetsutvikling

– Vi ser fram til å vidareutvikle desse undersøkingane i samarbeid med både NOKUT og utdanningsinstitusjonane, seier direktør i HK-dir, Sveinung Skule.

– Det vil styrke arbeidet med kvalitetsutvikling i både høgare utdanning og høgare yrkesfagleg utdanning at vi kan sjå dei i samanheng med kandidatundersøkingane, DBH og andre delar av kunnskapsgrunnlaget HK-dir har ansvaret for.

Vil samarbeide om overføringa

NOKUT skal arbeide som normalt med studiebarometera i 2024. Men NOKUT og HK-dir vil allereie no starte samarbeidet om undersøkingane.

– Det aller viktigaste er at kunnskapen som blir produsert blir tatt i bruk og bidreg til at utdanningskvaliteten blir utvikla vidare. Det er litt vemodig for oss å gi frå oss desse tre undersøkingane, men vi er sikre på at HK-dir vil halde fram med det gode arbeidet og vi vil samarbeide godt med dei både når oppgåvene no blir overførte og vidare framover, seier NOKUT-direktør Kristin Vinje.